درايش: لا للضريبة

والله هالديره عجيبه

بالقوانين المُريبه

يشفطونك يا مواطن

واحتمِل انت المصيبه!

اصرفَوا كل الموارد

مثل أسنان المبارد

واعلنَوا في دم بارد:

هذا هو وقت "الضريبه"

من نوى "القيمه المُضافه"

هو نسى "بند الضيافه"؟!

واللي يُنشر بالصحافه

عن "صناديقٍ" غريبه؟!

وقِّفُوا نهْش الذيابه

في بلد متروك غابه

و"عجْزكم" يضبط حسابه

يطفح الماي بجليبه

"عجْزكم" كلّه عياره

بوق/ تبذير/ وشطاره

عينكم بس للفقارى

واللي متعثِّر نصيبه

چان مو كل الأسامي

تنكشف، وأكبر حرامي

جهدكم ما سَد ظامي

وفعلكم ما فيه طِيبه

ودام مو روس الكبار

تنحشِر خلف الجدار

هالحچي ماله اعتبار

وراحت الديره نهيبه

وضّاح