درايش: لا تعاند أماني الناس

تعَبْنا من الصراع اللي دخَلنا فيه وأشقانا

وَهَن شَلّ الجسد كلّه وتسرّب في خلايانا

" مجالسكم" مثل أي شي ما هو صج

بس إسمي!

مشاكلكم ختم رسمي...

ولا واحد أبد منكم وقف في يوم ويّانا

عصا شلّت دواليب الشغل في الدار

إذا صار الشعَب كفّه...

وانتم في البلد كفّه...

شنو الدبره وشنو التبصار؟!!

هوا وغبار... غطّانا

وإذا اللي ما يبيه الشعب يتخلّى...

ولا يعاند أماني الناس

ترى تنحل هالعقده ومن الحمّى بعد "لا باس"

نقول الرب نجّانا

يا مركب خافق اشراعه تمايَل والهوا غربي

وشوفوا هالهوا الغربي لى وين اليوم ودّانا؟!

أخذنا في مشاويره وبنِص اليَم خلّانا!

ونسأل: يا موانينا...

أمانينا... موانينا...

بَعَدنا حيل عن سِيفك ولا ندري متى نوصل!

وضّاح