صدر العدد الأول بتاريخ 2 يونيو 2007

رئيس التحرير خالد هلال المطيري

العدد: 4567

رئيس التحرير خالد هلال المطيري

درايش : مريم...

  • 09-09-2020

يا صاحبي وصِّل كتاب النصايح

من قبل لا يمضي زمان النصيحه

من قبل فوت الفوت والوقت رايح

ويمحي أثرنا لا اعْصُفَتْ يوم ريحه

انتم أَهَل لمزخرفات المدايح

وانتم اصدورٍ كالمجالس فسيحه

وانتم زلال الماي عذْب القرايح

وانتم سواة النبع يروي القريحه

وانتم على "مريم" إذا صاح صايح

سورٍ بوجه الحادثات الكليحه

تنزّهوا عن خوض حرب الفضايح

في دارنا كل يوم نسمع فضيحه

هذا شراع... ولا انْكسَر يوم طايح

لا نفْس تبقى بسِيفها مستريحه

"دستورنا" مثل العلَم في البرايح

رزُّوه في وقت الليالي الشحيحه

هو الحكَم بين اختلاف الشرايح

"عقد" انكتَب بحروف جداً صريحه

ولا يندفن "قانون" بين الضرايح

لنّه عطى لفلان تهمه صحيحه

الشعب كم خايل من البرق لايح

حتى لو إن الحال ماهي مريحه

والصبر لو تبني عليه اللوايح

لابد ما يوصل لسمعك فحيحه

والغيظ مثل النَبْت لاشك فايح

مع الهبوب يذيع رمْثه و شيحه

مريم تنادي وجاوَب الطير نايح:

بالله من يشفي الأماني الجريحه؟!