ثلاث بطاقات ب اسم (أحمد)...

نشر في 07-11-2018
آخر تحديث 07-11-2018 | 00:13
 وضّاح يا فهد دورات هالدنيا عجيبه

إختلَط لون الخطا ويا الصواب

صار عندي شك في المعنى وريبه

كيف نمشي الدرب والدنيا ضباب!

انت تكتب في المواضيع الغريبه

ونا أرسم لون في جناح الغراب

والمصيبه إن كانت ظنوني مُصيبه

وما صدق لي برق في متن السحاب

من فهم يفهم وهقواته قريبه

ومن تمترس بالغبا يتبع سراب

كم تلّفتنا بلحظاتٍ صعيبه

وما لقينا واحد يرد الجواب

قلّت القدوات والديره جديبه

إلاّ ذكرى كالنسيم إن مَر هاب

إيد وحْده، عِد أصابعها النجيبه

زين يصفى لك ثلاثه بالحساب

الخطيب أحمد دوا الشعب وطبيبه

قامه بالتاريخ ما تدخل كتاب

أحمد اللي ما رضى لك بالغليبه

كان "نائب" شعب ضرس وكان ناب

أحمد اللي يا كثر في الدار طيبه

بينه وبين الشعب ماكو حجاب

وأحمد السعدون ما ينشف جليبه

ماي عذب يفور ما يحسب حساب

بوصله بالحق لا موقف يعيبه

هو عصا للشعب لا دارت ذياب

والنفيسي أحمد المذكور طيبه

لوّن أوراق "الطليعة" بالخضاب

الشديد،الليّن، الموسوم هيبه

الحليم، الثابت، العالي الجناب

لا يغرك لا لمَع بالراس شيبه

العزم في داخله ما زال شاب

يا بو موضي الوقت دوراته مريبه

وضاعت ألوان البشر واللون ذاب

إختلِف وياي أو إحْشِد كتيبه

أبقى فاتح لك غلا: 200 باب

back to top