صدر العدد الأول بتاريخ 2 يونيو 2007

رئيس التحرير خالد هلال المطيري

العدد: 3781

رئيس التحرير خالد هلال المطيري

درايش : انتداب مهاتير

  • 14-05-2018

لو يصلح استنساخ ننسخ مهاتير

وإلا نسوي له انتداب وإعاره

ونعطيه للإصلاح خيشة دنانير

علّه يصلّح في أمور الوزاره

بيشوف إن أحوالنا تختلف غير

و"علم الإداره" عندنا مو إداره

و"الرؤيه" رؤيا في المنام وتفاسير

وتوخذ قرارات البلد باستخاره

وإن الوزير اللي صدر فيه توزير

لأنه "محاصص" وادفعوا باختياره

حتى ولو هو كان - مع كل تقدير

كل المهن - بالأمس حارس عماره

بأول شهر يكتب مهاتير تقرير:

اش هالبلاد اللي شبيهه بمغاره

كورٍ مخلبص ما نفع فيه تفكير

كل ما سحبت الخيط زاد استداره

الكل ينهش مثل ما ينهش الطير

إذا نزل كالبرق فوق الحبارى

ما يرحمون بلادهم كالمناشير

والنهب صار يفلسفونه شطاره

ومحّد يحاسب إن حصل يوم تقصير

حتى الذي خلى الوظيفه... تجاره

لكن بعد مدّه مهاتير شيصير؟

إمّا تطبّع طبْعنا في الزياره...

وإلاّ يحوشه ضغط في ديرة الخير

ويقول جهدي في بلدكم خساره!